სანელებლების კუნძულები
აღმოსავლეთ აფრიკის ნაპირებთან, ინდოეთის ოკეანეში, მდებარეობს მარჯნის კუნძულები: ზანზიბარი და პემბი. კუნძულები ბუნებრივი პირობებით ერთნაირია, ორივე ტანზანიის შემადგენლობაში შედის.
მარჯნის კუნძულების ქანებზე, ნაყოფიერ წითელ მიწებზე, კარგად ხარობს მიხაკი, ფეტვი, ბრინჯი, მანიოკი და ბატატი მანიოკის კარტოფილის მსგავსი ფესვებიდან სპეციალური დამუშავების შემდეგ ამზადებენ ფქვილს, ბურღულს და სახამებელს. წამყვანი კულტურაა ზანზიბარის მიხაკი, რომლითაც კუნძულები მსოფლიოშია განთქმული.
მთავარი ქალაქია ნავსადგური ზანზიბარი, რომელსაც თეთრი ფერის ნაგებობანი და მრავალრიცხოვანი მეჩეთები აღმოსავლურ იერს აძლევს. შენობათა ყველაზე ლამაზი ნაწილი კარებია, რომლებიც ბინის მფლობელის სიმდიდრეზე მეტყველებს. კარებს ძვირფასი ხის მასალისაგან აკეთებენ, ისინი ისეთი ლამაზია, სხვადასხვანაირი ჩუქურთმებით (ლოტოსის ყვავილი, ზღვის ტალღები და სხვ.), რომ აქ ასეც კი ხუმრობენ: ზანზიბარაში ჯერ კარებს ირჩევენ, შემდეგ კი ბინასო. კარები, ისე როგორც ხელოვნების სხვა ნიმუშები, ეროვნული საკუთრებაა.