ვარანასი
ქალაქი ვარანასი, რომელიც ითვლება მსოფლიოს ერთ-ერთ უძველეს ქალაქად, მდებარეობს ჩრდილოეთ ინდოეთში, უტარ პრადეშის შატატში მდინარე განგის ნაპირზე . ზოგი მას აღმოსავლეთის ვენეციას ეძახის ვიწრო ქუჩების და ნავების სიმრავლის გამო. ის ერთ-ერთია ჰინდუსების შვიდი წმინდა ქალაქიდან და ამიტომ ითვლება, რომ თუ ვარანასი არ ნახე ესეიგი ინდოეთიც არ გინახია. მისი ისტორია 3000 წელს ითვლის.
ადგილობრივებისთვის ვარანასი ტრადიციული ინდური კულტურის დედაქალაქია. მდინარე განგის სანაპირო მუდამ სავსეა ინდუისტი მორწმუნეებით და პილიგრიმებით, რადგან წმინდა მდინარეში ბანაობა ითვლება სულიერ განწმენდათ ჩადენილი ცოდვებისაგან. განწმენდის რიტუალი იწყება ყოველ დღე მზის ამოსვლის თანავე. ერთ-ერთი ყველაზე შთამბეჭდავი და დაუვიწყარი რიტუალია გარდაცვლილის დაწვა მდინარის ნაპირზე. ჯერ გარდაცვლილის სხეულს დაატარებენ ქალაქის ქუჩებში მუსიკის და დოლის თანხლებით, შემდეგ ტრადიციის თანახმად სხეულს სანაპიროზე დანთილ კოცონზე წვავენ და ფერფლს მდინარეში ყრიან.
ქალაქის ცენტრი განსაკუთრებით გამოირჩევა ტაძრების სიმრავლით. აქ მდებარეობს ჰინდუსების ”ოქროს ტაძრები” : დურგა და ბარატ მატა მანდირი, რომელთა დათვალიერება არაინდუისტებისთვის მხოლოდ გარედან არის შესაძლებელი, შიგნით შესვლა უცხოელი ტურისტებისათვის აკრძალულია. ქალაქის ღირსშესანისნაობებს მიეკუთვნება ასევე რამნაგერის ფორტი რომელიც იყო ადგილობრივი მაჰარაჯას სასახლე, ბანარას უნივერსიტეტი , ბარატ კალა ბავანის მუზეუმი სადაც შესაძლებელია ინდუისტი და ბუდისტი ხელოვანების სკულპტურების და ნახატების დათვალიერება. ვარანასში საუკუნეების განმავლობაში ვითარდებოდა ინდური მუსიკა და დღეს მუსიკის მოყვარულებისთვის ის ნამდვილად იდეალური ადგილია ტრადიციულ ინდურ საკრავებზე, ტაბლაზე და სიტარზე , დაკვრის სასწავლად.