ეს არის რწყილი და ჭიანჭველა მეგრულად სრული ვერსია და ოთკუთხედები რომ არის ის არის მეგრული ასოები რომლებიც სამწუხაროდ არ იწერება ამიტომ ვინც მეგრული იცით მიხვდებით ვინც არადა ეხა უფრო მაგრად იმტვრიეთ ენა.
წყირი დო ჭიჭკიტია
მართალე ათე ქიანას არძას ოსაჭირუ – კოჩისით, ორინჯისით, მხეც-ფრეველისით დო ჭიჭე სქილედის – მწერს ხოლო. ოდო, ართშახ ართი წყირი დო ჭკიჭკიტიაქ დეჯიმალეს დო გიოდირთეს შარას ართო. გილეშეს ბედინიერო, გინილეს ბრელი გოლა, ბრელი მინდორი დო ბოლოს ართ მორდილ რუს ქიმიოდირთეს. წყირქ უწუ ჭკიჭკიტიას:
– მა გეგნოფსხაპუნქ დო სი მუს ქიმინუნქია?
– მა ხოლო გეგნოფსხაპუნქია, – უგამუ ჭკიჭკიტიაქ.
წყირქ ეცოყუ (დინჭირუ) დო გეგნოსხაპუ. ეცოყუ ჭკიჭკიტიაქ ხოლო დო შქა წყარს ქიდნატყვაპუ. მიდეღუ წყარქ ჭკიჭკიტია, ორწყე საშველი ვარე-ნი დო წყირს ქიშეეხვეწუ:
– ჯიმაია, ქიმმეხვარი მუთუნი, ნუ დუმოშქვიდუანქია.
წყირს დუდო მუთუნ ვაახვარინედუ, ათეშ გეშა ესხაპუ, გესხაპუ, მიდართუ ღეჯიშა დო ქიშეეხვეწუ:
– ღეჯი, ქომუჩ ძაგარი,
– დოვგიროხუნქ თოკს-ბაწარს,
– დინვუჸოთანქ დო გიშეპონანქ
– ჩქიმ ჯიმაჩაფილ ჭკიჭკიტიას.
ღეჯქ გურიშ ჩამათ ურჩქილუ დო უწუ:
– სი ჩქიმდა კი ვამოგიღალუნია ნი, მუჭოვა?
წყირქ ხოლო ესხაპუ, გესხაპუ, ქიმერთუ ჭყონიშა დო თხუუ:
– ჭყონი, ქომუ კი,
– კის მევუღანქ ღეჯის,
– ღეჯი მუჩანს ძაგარს,
– დოვგიროხუნქ თოკს-ბაწარს,
– დინვუჸოთანქ დო გიშეპონანქ
– ჩქიმ ჯიმაჩაფილ ჭკიჭკიტიას.
ჭყონქ ქურჩქილუ, შხუ ჸალეფს ქუდუქანცალუ დო უწუ:
– სი ჩქიმდა კვარია ვამოგიშორებუნია ნი, მუჭოვა?
წყირქ კინი ესხაპუ, გესხაპუ, ქიმერთუ კვარიაშა დო თხუუ:
– კვარია, ჩერცხი ჭყონის,
– ჭყონი მუჩანს კის,
– კის მევუღანქ ღეჯის,
– ღეჯი მუჩანს ძაგარს,
– დოვგიროხუნქ თოკს-ბაწარს,
– დინვუჸოთანქ დო გიშეპონანქ
– ჩქიმ ჯიმაჩაფილ ჭკიჭკიტიას.
კვარიაქ ქურჩქილუ დო ურჩხვიუ:
– სი ჩქიმდა წიწილა ვამოგიჸონაფუნია ნი, მუჭოვა?
წყირქ დოშურდუ თიზმა სხაპუათი, მარა მუ ოკო ქიმინუკო, მაჸალე ოღუპუდუ დო დუდ ვადანებინედუ. ხოლო ესხაპუ, გესხაპუ, ქიმერთუ მონჭვაშა დო თხუუ:
– მონჭვა, ქომუჩ წიწილა,
– წიწილას ვუძღვინუნქ კვარიას,
– კვარია დათმენს ჭყონის,
– ჭყონი მუჩანს კის,
– კის მევუღანქ ღეჯის,
– ღეჯი მუჩანს ძაგარს,
– დოვგიროხუნქ თოკს-ბაწარს,
– დინვუჸოთანქ დო გიშეპონანქ
– ჩქიმ ჯიმაჩაფილ ჭკიჭკიტიას.
მონჭვაქ ქიდიკუხუ, გოკვიზონდუ დო უწუ:
– სი ჩქიმდა ფატი ვა მოგიღალუნია ნი, მუჭოვა?
ქიშეწუხუ წყირქ, მარა შხვა შარა ვაუღუდუ, ხოლო ესხაპუ, გესხაპუ, ქიმერთუ ფატიშ ორომეშა დო თხუუ:
– ორომე, ქომუჩ ფატი,
– ფატის მევუღანქ მონჭვას,
– მონჭვა მუჩანს წიწილას,
– წიწილას ვუძღვინუნქ კვარიას,
– კვარია დათმენს ჭყონის,
– ჭყონი მუჩანს კის,
– კის მევუღანქ ღეჯის,
– ღეჯი მუჩანს ძაგარს,
– დოვგიროხუნქ თოკს-ბაწარს,
– დინვუჸოთანქ დო გიშეპონანქ
– ჩქიმ ჯიმაჩაფილ ჭკიჭკიტიას.
ორომექ გააფიჩინუ პიჯი დო უწუ:
– სი ჩქიმდა ჭუკი ვა მოგიშორებუნია ნი, მუჭოვა?
წყირს ბრელ ვაუფიქრებუ, ხათე ესხაპუ, გესხაპუ, ქიმერთუ ჭუკიშა დო ქიშეეხვეწუ:
– ჭუკი, ჩერცხი ორომეს,
– ორომე მუჩანს ფატის,
– ფატის მევუღანქ მონჭვას,
– მონჭვა მუჩანს წიწილას,
– წიწილას ვუძღვინუნქ კვარიას,
– კვარია დათმენს ჭყონის,
– ჭყონი მუჩანს კის,
– კის მევუღანქ ღეჯის,
– ღეჯი მუჩანს ძაგარს,
– დოვგიროხუნქ თოკს-ბაწარს,
– დინვუჸოთანქ დო გიშეპონანქ
– ჩქიმ ჯიმაჩაფილ ჭკიჭკიტიას.
ჭუკიქ ლეჩქვი ქამურმულუ, გემნარიჟინუ (ოჸირზინუ) თოლეფი დო ქუწურწინუ:
– სი ჩქიმდა კატუ ვამოგიშორებუნია ნი, მუჭოვა?
წყირქ ესხაპუ, გესხაპუ, ქიმერთუ კატუშა დო თხუუ:
– კატუ, ჩერცხი ჭუკის,
– ჭუკი დათმენს ორომეს,
– ორომე მუჩანს ფატის,
– ფატის მევუღანქ მონჭვას,
– მონჭვა მუჩანს წიწილას,
– წიწილას ვუძღვინუნქ კვარიას,
– კვარია დათმენს ჭყონის,
– ჭყონი მუჩანს კის,
– კის მევუღანქ ღეჯის,
– ღეჯი მუჩანს ძაგარს,
– დოვგიროხუნქ თოკს-ბაწარს,
– დინვუჸოთანქ დო გიშეპონანქ
– ჩქიმ ჯიმაჩაფილ ჭკიჭკიტიას.
კატუქ თოლეფი მეწკურუ (ქიმკოდუ), ღირსუანო გეგნისუ ოშუმეშის თოთი დო ქიდიკუმინუ:
– სი ჩქიმდა ბჟა ვა მოგიღალუნია ნი, მუჭოვა?
წყირქ კინი კვირჩხალო ეცოყუ, ესხაპუ, გესხაპუ, ქიმერთუ ჩხუშა დო თხუუ:
– ჩხუ, ქომუჩი ბჟა,
– ბჟას მევუღანქ კატუს,
– კატუ დათმენს ჭუკის,
– ჭუკი დათმენს ორომეს,
– ორომე მუჩანს ფატის,
– ფატის მევუღანქ მონჭვას,
– მონჭვა მუჩანს წიწილას,
– წიწილას ვუძღვინუნქ კვარიას,
– კვარია დათმენს ჭყონის,
– ჭყონი მუჩანს კის,
– კის მევუღანქ ღეჯის,
– ღეჯი მუჩანს ძაგარს,
– დოვგიროხუნქ თოკს-ბაწარს,
– დინვუჸოთანქ დო გიშეპონანქ
– ჩქიმ ჯიმაჩაფილ ჭკიჭკიტიას.
ჩხუქ დიზუმინუ, წყირს გვირა თოლეფი ქიმკაშტერუ დო ნკორუათი უწუ:
– სი ჩქიმდა ოდიარე ვა მოგიღალუნია ნი, მუჭოვა?
წყირს მეტი ვეშეულებუდუ, თიზმა სხაპუათი ბირგულეფქ აწყუნუ, დუდ-პიჯის უფუ გინალედუ დო ძიუთ შურს კაშუნდუ, მარა მაჸალეს იშენთ ვაუღალატუ, დოტიტონუ ბლომათ ოდიარე დო ჩხუს წიმი ქიმწურღვუ.
ჩხუქ დოლირჯგონუ ლორთქოში ოდიარე დო ქიმეჩუ ბჟა. წყირქ ბჟა კატუს ქიმეუღუ, კატუქ ჭუკის ჩერცხუ, ჭუკიქ – ორომეს, ორომექ ფატი ქიმეჩუ, წყირქ ფატი მონჭვას ქიმეუღუ დო მონჭვაქ ხოლო ართი წიწილა ქაჩუქუ, წყირქ ხათე კვარიას ქიმიანჭუ დო წიწილა ქიმეუჸონუ. კვარიაქ დეთხუ ჭყონს, ჭყონქ ქიმეჩუ კი დო კი ღეჯს ქიმეუღუ. გახარებულ ღეჯქ მთელი ყვინგიშ ძაგარი გეგლიკიჭონუ დო წყირს ქიმეჩუ. წყირქ ხათე დოგიროხუ ბაწარი, ქიდნუჸოთუ ჭკიჭკიტიას დო გაგშეჸონუ.
ჭირი თექი, რხინი თაქი,
ჩვენჩვი თექი, ქვირი თაქი.
გითხარით გაგრძელება იქნება მეთქი და აჰა.. ამ პოსტისათვის დიდი მადლობა “გიგი”-ს არ ვიცი საიდან მოიტანა იმ ადამიანმა ეს ტექსტი მაგრამ მთავარია სრული ვერსიაა.
