მზის მხოლოდ წვრილი ნამგალი მოჩანს და ცა სწრაფად ბნელდება.უეცრად სინათლის უკანასკნელი სხივიც ქრება.მთვარის ბნელ დისკოს გარს ცეცხლის ვარდისფერი რკალი და ბრჭყვიალა სინათლის შარავანდედი აკავს.მზის სრული დაბნელება თავის კულმინაციას აღწევს.
როცა მთვარე დედამიწასა და მზეს შორის გადის,ის მზის ყვითელ დისკოს ეფარება.ამის შედეგად ხილული ხდება მზის გარე ფენა,ე.წ. კორონა,ანუ მზის გვირგვინი.ეს ულამაზესი სანახაობა საოცარი დამთხვევის შედეგია:მთვარე და მზე დედამიწის ცაზე თითქმის ერთი ზომისაა.სინამდვილეში მზე მთვარეზე 400-ჯერ უფრო დიდია,მაგრამ,ამავე დროს,ჩვენგან 400-ჯერ უფრო შორსაცაა.
სრული დაბნელება მაშინ ხდება,როცა მზის ყვითელი დისკო მთლიანადაა დაფარული.ეს შეიძლება რამდენიმე წუთს გაგრძელდეს.მზის დაბნელების დანახვა მხოლოდ იქ შეიძლება,სადაც მთვარის ჩრდილი დედამიწის ზედაპირს ხვდება.უფრო ფართო ტერიტორიაზე ნაწილობრივ დაბნელებას ვხედავთ,რაც იმას ნიშნავს,რომ მთვარე მზეს მხოლოდ ნაწილობრივ ეფარება.ნაწილობრივი დაბნელების დროს ცა არ ბნელდება და მზის გვირგვინსაც ვხედავთ.
მთვარის დაბნელება
ზოგჯერ მთვარე დედამიწის ჩრდილში ხვდება.მზის სინათლე მთვარეს აღარ ეცემა და აღარ ირეკლება.ეს მთვარის დაბნელებაა.თუმცა,მთვარე სრულიად უხილავი მაინც არ ხდება,ის,როგორც წესი,მკრთალ-ნარინჯისფერ-ყავისფრად ანათებს.ამ განათების მიზეზი ატმოსფეროში გარდატეხილი და შემდეგ დედამიწის ჩრდილში მოხვედრილი მზის სინათლეა.მთვარის დაბნელება დედამიწის ყველა წერტილიდან მოჩანს,სადაც მთვარე ამოსულია, და ზოგჯერ 2,5 საათს გრძელდება.
