მიროსლავ ტიხი (Miroslav Tichy) – მოხეტიალე ფოტოგრაფი…
“ჩემთვის ქალები ეს უბრალოდ ლაიტმოტივია. მე არასოდეს გამოვკიდებივარ კაბებს უკან. მაშინაც კი, როდესაც ვხედავ ქალს, რომელიც ძალიან მომწონს და შემიძლია გამოველაპარაკო მას – მე ვხვდები, რომ ჩემთვის ეს მაინც არაა საინტერესო. ამიტომაც ვიღებ ხელში ფანქარს და ვხატავ მას. ეროტიზმი ეს უბრალოდ სიზმარია, სამყარო კი – ილუზია, ჩვენი ილუზია.” – მიროსლავ ტიხი.
მსოფლიო ფოტოხელოვნებაში ერთ-ერთ ყველაზე უცნაურ ადამიანად შეძლება ჩაითვალოს ჩეხი ფოტოგრაფი მიროსლავ ტიხი (1926 წელს დაბადებული). ის თავად თავისი ხელებით ამზადებდა ფოტოაპარატს. მასალას კი ნაგავსაყრელებზე ეძებდა. დაწყებული სიგარეტის კოლოფებით, დამთავრებული კონსერვის ქილებით. მისი ჯადოსნური ხელები ყველაფრისგან ქმნიდა მისთვის საყვარელ ფოტოკამერებს. ლინზებსაც კი მოხეტიალე ფოტოგრაფი ასევე თავისი ხელებით აკეთებდა, სხვადასვა მინებისგან, რომლებსაც კბილის პასტით აპრიალებდა.
მას გიჟად თვლიდა ყველა, მაგრამ ეს სულაც არ აღელვებდა. ის თავის სურათებთან ერთად ცხოვრობდა მარტო და არ აინტერესებდა ირგვლივ არაფერი. დახეტიალობდა ქუჩებში და თავისი გაკეთებული ფოტოაპარატით უღებდა სურათებს ქალბატონებს. ძირითადად ფანჯრიდან, საცურაო აუზების ღობეებიდან, ქუჩებში, მაღაზიებსა და პარკებში… ის ამას აკეთებდა მხოლოდ თავისთვის. არასოდეს უფიქრია, რომ მის ნამუუშევრებს სხვაც ნახავდა ოდესმე ან გაიყიდებოდა კიდეც.
ყოველ დღე ის ბრუნდებოდა სახლში ასობით სურათით და ბეჭდავდა, ასევე თავისი ხელით გაკეთებულ პრიმიტიულ მოწყობილობაზე. ბევრი სურათი მტვერმა შეჭამა, ან ვირთხების მსხვერპლი გახდა. ზოგი სურათი კი ისე ძალიან უყვარდა მიროსლავ ტიხის, რომ მათთან ერთად ეძინა და ჭამდა კიდეც. სულ თან დაჰქონდა და არ იშორებდა არასოდეს.
გავიდა წლები და ის “აღმოაჩინეს”. ყოფილი ლოთი, მარტოხელა, მოხეტიალე ფოტოგრაფი გახდა ძალზედ ცნობილი. მისი სურათები დღეს ცნობილ გალერეებში იწონებს თავს და ათობით ათასი ევრო ღირს.
***********************************************************************************
***********************************************************************************